முந்த்ரா துறைமுகம் இந்தியாவின் மொத்த சரக்கு இயக்கத்தில் நான்கில் ஒரு பங்கைக் கையாளுகிறது. குஜராத், மஹராஷ்டிரா, கோவா, கேரளா, ஆந்திர பிரதேசம், தமிழ்நாடு மற்றும் ஒடிஷா ஆகிய ஏழு கடலோர மாநிலங்களில் 13 உள்நாட்டு துறைமுகங்களில் அதானி குழுமத்தின் பங்கு உள்ளது.

இதில் நிலக்கரியால் இயங்கும் ஒரு பெரிய மின் நிலையம் மற்றும் ஒரு சிறப்பு பொருளாதார மண்டலமும் உள்ளது.

முந்த்ரா துறைமுகம் உலகிலேயே மிக அதிக அளவு நிலக்கரியை இறக்கும் திறன் கொண்டது. இந்த துறைமுகம் சிறப்பு பொருளாதார மண்டலத்தின் கீழ் கட்டப்பட்டுள்ளது, அதாவது அதை இயக்கும் நிறுவனம் எந்த வரியும் செலுத்த வேண்டியதில்லை.

இந்த மண்டலத்தில் மின் உற்பத்தி நிலையங்கள், தனியார் ரயில் பாதைகள் மற்றும் தனியார் விமான நிலையமும் உள்ளது.

சமையல் பொருட்களின் வணிகம்

1999 ஜனவரியில் அதானி குழுமம், வில் அக்ரி பிசினஸ் குரூப் வில்மருடன் கைகோர்த்து சமையல் எண்ணெய் வணிகத்தில் நுழைந்தது. இன்று நாட்டில் மிக அதிகம் விற்பனையாகும் பார்ச்சூன் சமையல் எண்ணெயை அதானி-வில்மர் நிறுவனம் தயாரிக்கிறது.

ஃபார்ச்சூன் ஆயில் தவிர அதானி குழுமம், நுகர்பொருட்கள் துறையில் கோதுமை மாவு, அரிசி, பருப்பு வகைகள், சர்க்கரை போன்ற டஜன் கணக்கான பொருட்களை உற்பத்தி செய்கிறது.

2005 ஆம் ஆண்டில் அதானி குழுமம், இந்திய உணவுக் கழகத்துடன் இணைந்து, நாட்டில் பெரிய பெரிய தானிய சேமிப்பு கிடங்குகளை(silos)அமைக்கத்தொடங்கியது. இவற்றில் தானியங்கள் பெரிய அளவில் சேமிக்கப்படுகின்றன.

ஆரம்பத்தில் 20 ஆண்டு கால ஒப்பந்தத்தின் கீழ் அதானி குழுமம், நாட்டின் பல்வேறு மாநிலங்களில் சிலோஸ்களை கட்டியது. இந்தியா முழுவதும் உள்ள சிலோ யூனிட்களில் இருந்து விநியோக மையங்களுக்கு உணவு தானியங்களை கொண்டு செல்ல வசதியாக தனியார் ரயில் பாதைகளையும் அதானி குழுமம் உருவாக்கியது.

இன்றைய தேதியில் இந்திய உணவு கழகம் மற்றும் மத்தியப் பிரதேச அரசின் உணவு தானியங்களை அதானி அக்ரி லாஜிஸ்டிக்ஸ் லிமிடெட், தனது சிலோக்களில் சேமிக்கிறது.

இதில் இந்திய உணவுக் கழகத்தின் 5.75 லட்சம் மெட்ரிக் டன்களும், மத்திய பிரதேச அரசின் மூன்று லட்சம் மெட்ரிக் டன் உணவு தானியங்களும் அடங்கும்.

நிலக்கரி சுரங்கம்

2010 ஆம் ஆண்டில் அதானி, ஆஸ்திரேலியாவின் லிங்க் எனர்ஜி நிறுவனத்திடமிருந்து 12,147 கோடிக்கு நிலக்கரிச் சுரங்கத்தை வாங்கினார் என்று பார்ச்சூன் இந்தியா இதழ் கூறுகிறது.

கெலி பெஸ்ட் குயின் தீவில் உள்ள இந்த சுரங்கத்தில் 7.8 பில்லியன் டன் கனிம இருப்பு உள்ளது. இது ஒவ்வொரு ஆண்டும் 60 மில்லியன் டன் நிலக்கரியை உற்பத்தி செய்ய முடியும்.

இந்தோனேசியாவில் எண்ணெய், எரிவாயு மற்றும் நிலக்கரி போன்ற ஏராளமான இயற்கை வளங்கள் உள்ளன. ஆனால் உள்கட்டமைப்பு வசதி இல்லாததால், இந்த வளங்களை போதுமான அளவு பயன்படுத்த முடியவில்லை.

2010 ஆம் ஆண்டில், அதானி குழுமம் இந்தோனேசியாவின் தெற்கு சுமத்ராவிலிருந்து நிலக்கரியை கொண்டு செல்ல 1.5 பில்லியன் டாலர் மூலதன முதலீட்டை அறிவித்தது. இதற்காக தெற்கு சுமத்ராவில் கட்டப்படும் ரயில் திட்டத்துக்கான ஒப்பந்தம் அங்குள்ள மாகாண அரசுடன் கையெழுத்தானது.